Blauw - Wit Bloed.
Toen ik met dit stukkie begon, mus ik denken aan het t./v. programma Blauw Bloed.
Nou kiek ik nooit naor dat programma, want ik heb niks met die lui waor dat over gaait. Nee, ik heb veul meer respect veur de vrijwilligers, die hier in de buurt rondlopen met blauw-wit bloed in de aoders. Die aal heur vrije tied besteed aan de v.v. Nei Roon. Dankzei dizze vrijwilligers is de v.v. Nei Roon oetgruid tot een geweldig mooie voetbalclub, waor ik al meer dan zestig jaor lid van ben. Der wordt mai wel ies gekscherend vraogd : “Hou kan het eigenlieks, dat veul clubs nao de oorlog opricht wörden in 1946, maor de v.v. Nei Roon in 1947! Lopen jullie altied een jaor achter?” Om die vraog te beantwoorden kom ik der niet onderoet om een stukkie geschiedenis over de club te vertellen. Veur de oorlog was der op Nei Roon ( ‘t Ronerveld) ok een voetbalclub met de naom V.I.A. (Voetbal is Alles). In de kantine hangt nog een kaast met foto’s en bekers oet die tied. Dizze club is toen over de kop gaon, omdat de contributie aan de bond niet betaold kun worden. Direct nao de oorlog zul der weer een club opricht worden. Ze hadden zomaor weer een paor elftallen bij mekaor. Maor.....,toen ze op het gemeintehoes kwamen om de club aan te geven, zat daor ein die zee : “Ho ho ies even, dat gaait zomaor niet!! Jullie club is veur de oorlog over de kop gaon met een schuld bai de bond. Nou het de v.v. Roon die schuld aan de bond betaold met as veurwaorde, dat der in de gemeinte Roon gien twaide zundagclub opricht worden mag!!” Daor zaten ze met een groot probleem. Op een verjaordags feesie van ain van de oprichters was dit natuurlijk het gesprek van de aovend. Bai touval zat daor ok ain bai, die in het bestuur zat van de D.V.B. ( Drentse Voetbal Bond ) Die beloofde, dit geval ies oet te zuiken, want hai von het maor een raor verhaol. Nao een paor daogen is die der achter kommen, dat de schuld nooit betaold is!! Toen bennen ze as de wiede weer-
gao hèen gaon om alles te betaolen en kun de club in 1947 asnog lösgaon.
Ik ben hartstikke bliede, dat de verholling tussen de clubs Roon en Nei Roon heul goud is. Maor je kunt je natuurlijk wel veurstellen, dat de generaotie van mien Vaoder daor huil aans over daacht. Wai mochten van een ieder verleizen, maor as wai van Roon verloren, ( enkeld kwam het veur, dat schoonheid het van bruud geweld won!! ) Dussen wai zowat niet thoes kommen. Wat veur geweldig mooie dingen as,wai met dizze club beleefd hebben, is teveul om in dit stukkie op te schrieven. Daorover graog een aander maol.
Rits Aalders
