Het jaor van het voetbalcollege!
Moi Noordenveld
Zo rond de jaorwisseling wordt der altied even terugkeken en je kunnen wel zeggen dat 2014 het jaor van de voetballers was. Sportman, sportploug, trainer van het jaor …het waren allemaol voetballers. Mor wai hier in Noordenveld hadden dat allaang in de gaoten, want wai hadden in het veurjaor al een naai voetbalcollege!
Jao, het kan raor lopen…..
Zo vleig ie as aanvoerder in de korte boksem achter een bal an in de bossen van Nörg....en zo bej aanvoerder van gemeintebelangen en wetholder.
Zo maok je je drok over de meugelijke degradaotie van elf voetballers in Paais en zo moej je as loco burgemeester drok maoken over meer dan dartigdoezend inwoners.
Zo bej prominent Roden Fier(der) en zo moet je je op een totaol aandere maneier bezig hollen met sociaole zaoken.
Mor as wai de kwaliteit van dit college moeten vergelieken met de kwaliteit van de voetballeraai in de gemeinte, dan liekt het mai neit best. Een gemeinte as Noordenveld moet toch zeker een eerste klas voetbalclub hebben, zoneit een hoofdklasser. En wat hebben wai?
Ik heur al zo laang ik mai kan herinneren: In Roon kunnen ze wel voetballen, mor ze hebben gien karakter. Nou en in Paais hebben ze wel karakter, mor kunnen ze neit voetballen en in Nörg hebben ze van alles wat en met mekaor net niks….
En dan wordt dat alles aanvoerd door een burgemeester die zich nogal met sportclub Veendam bemuid het… nou we weiten hou dat aoflopen is!
Het was in de leste maonden op het gemeintehoes ein en al voetbalpraot, voetbaltactiek en voetbalregels. Het eerste bewies was der direct al. Dit college haar nog neit eins aoftrapt, toen hadden ze Otto Huisman al oetlegd wat “boetenspel” is.
En de oppositie moet ok neit denken dat ze de kommende jaoren kunnen scoren. Dit college denkt en handelt volgens het gedachtengoud van de einige voetbalgoeroe die Nederland riek is, en die zee: “As je de bal neit hebben, dan kuj ook neit scoren”. En het is je wel dudelijk waor de bal lig, toch? Nei Noaberschap beteikent dan ok denk ik: Je muggen overal wat van vinden, mor wai maoken de opstelling. En denk mor neit dat ze wat van je an nemen, want Cruijff zee: Je kunnen beter ten onder gaon met je eigen visie, dan met die van een aander. Het politieke debat zal er dus in dizze coalitieperiode neit dudelijker op worden. Net as bai onze eeuwige nummer veertien is der vast gien touw an vast te knuppen. Je denken het klinkt logisch, mor je snappen der gien bal van. Naovraogen het ok gien zin, want ok hier volgen ze vast en zeker zien onnaovolgbaore wieshaaid “ As ik wil daj mai begriepen, dan haar ik ‘t wel beter oetlegd. De oppositie zit op de tribune, in het vak aachter het doel!
Dus der blif veur heur mor ein ding over …. Vuurwark gooien! Politiek vuurwark, midden in de Raods Arena, mor dan wel op het juuste moment. Er is naomelijk mor ein moment wanneer je op tied bennen, zee e, op alle aandere momenten bej of te vroug of te laot. Vuurwaark op het verkeerde moment, dat bennen “ lösse flodders”, veurstellen die allennig mor bedould bennen om de aandacht te trekken, en waorvan het college denkt: Dank je de koekoek, daor begunnen wai niet an!
Mor goud an de aandere kaant is het misschien ok een veurdeil dat het voetballers bennen......Want in Nederland hebben politiek en voetballeraai veul overeinkomsten.
Bijna heul Nederland denkt der verstand van te hebben… Bijna heul Nederland het der commentaar op. Wai weiten het allemaol beter en wai weiten veural wat der verkeerd gaait.
Mor veur baaiden geldt, dat het zo verrekte jammer is, dat der niet veul bennen die het spel echt kunnen verbeteren. Ze moeten dan wel de tied en ruumte kriegen, want as de resultaten in de ogen van al die kenners, een beetie te laang oetblieven, dan worden ok dizze trainers aander keer zo weer votstemd.
Lammert Keizer
