Lievern döt weer met

Lammie Venekamp

deur Lammy Venekamp, keurnoot veur Lievern van Het Hoes van de Taol.

Op de zaoterdag veur Ronermaark laoten ze in Roon het resultaot zain van onderlinge inspanning en saomenwarking in de vörm van een optocht. En Lievern döt weer met!
Optocht.
Spiekers, haomers, zaog en knieptang, een teikening op schaol,
Een goeie waogen en ’t neudige materiaol,
Ein, die de leiding in handen hèt,
De volledige bedoeling van de waogen kent, de punties op de i zet.
Een groep mannen en vrouwen, die saomenwarken kunnen
En dan aan ’t waarkstuk begunnen.
Ze bouwen de waogen op en overleggen met elkander,
Waor d’ein gien raod met weit, dat weit wel weer een ander.
As de figuranten anwezen bennen, kunnen die an de slag,
Ze overleggen over wat ’t mooiste is en over wat niet mag.
Zo hebben ze heul wat aovends vertier met heur waogen.
Helpers genog, ze huiven haost niet te vraogen.
Veural in ’t lest wordt elk actief en pakt men an,
’t Moet pico bello, haalf waark daor holden ze niet van.
’s Aovends veur de optocht stiegt de spanning ten top,
Ze begunnen kritisch te worden, zit alles er an en er op?
Want mörgen moeten wai tonen,
Dat wai in Lievern wonen!
As dan de optocht echt begunt, zai wel twintig verzörgde waogens in een lange rij,
Elk beeldt wat oet, muziekkorpsen der tussen, want muziek heurt er bij.
De stoet komp reur, honderden mensen staon te kieken,
Laoten heur waardering blieken.
De jury hèt ’t moeilijk, net as veurgaonde jaoren,
Ze zal gienein de kritiek bespaoren.
Het gaait om priezen, mor ok al zuj as bouwers zunder pries naor hoes gaon,
De mooiste pries is, docht ik, veur oons :
“ Wai Lieversen hebben dit saomen daon!”