Moi Noordenveld, deur Rits Aalders oet Nei Roon.

 

Een schoffie terug wör ik mij der nog ies weer van bewust, hou veul goud wark de keurnoten en heur metwarkers in de maond meert doun. Ze gaon dan naomelijk bij de schoulen langs om de kinder in de streektaol veur te lezen, waor zölfs oonze burgemeester an metwarkt het.

Eigenlijk is ain keer in ‘t jaor veul te weinig. Der bennen mèensken in oonze omgeving, die een verschrikkelijke taolachterstand hebben. Ik zat naomelijk op een feesie met ain te praoten oet Roon, maor zie kun mai niet goud verstaon, as ik plat pruit. Nou bennen wai Drenten natuurlijk wel zo, dat as wai marken,dat zie oons niet verstaon, wai oons huil makkelk anpassen.Maor toen ik heur vruig, houlang zie al in Roon woonde, schrok ik toch echt. Zie zee : “Ik ben hier geboren!!” Verbaosd vruig ik : “Maor hou praoten jullie thoes dan?” Toen zul ze mai even te plak zetten. Zie zee : “Wij praten thuis alleen maar A.B.N.”

Op zu’n moment doej der goud an om je huil onneuzel te holden. Ik zee : “A.B.N.? Wat is dat dan?” Zie zee : “Dat is Algemeen Beschaafd Nederlands.” “Oho, maor ik praot van hoes oet ok A.B.N. hör! Wij praoten Algemein Beschaofd Nedersaksisch!! Maor ja, aj je best niet wilt doun om het een beetie te begriepen!?” Over taolachterstand gesproken.

Daj met veurlezen op de schoulen ok nog wel ies wat beleven kunt, bewees ain van de keurnoten op een schoul in de gemeeinte Noordenveld. Welke schoul, dat döt der niet tou.

Zie had een mooi, spannend verhaol metnomen en de kinder luusterden dan ok met veul aandacht. Het vaalt de keurnoten altied op, dat de kinder, ok al praoten ze thoes gien Drèents, de streektaol toch goud kunnen verstaon. Ok in de klas, waor wai het nou over hebben. Zie waren allemaol vol aandacht, op ein jonkie nao. Die was zo drok en zie kun hum niet bij de les holden. Zie had hum al een maol of wat waorschouwd, maor het hölp niks . De juf, die ok in de klas zat, zee tegen hum : “Wat hej toch kerelie. Je bent aans nooit zo drok.” “Nou”,zeg het jonkie, “ik ben wat zenuwachtig juf, want tussen de middag komp oonze neie vaoder mai ophaolen.”Zien kammeraodtie, die naost hum zit, zeg : “Een neie vaoder? Dan loop ik om twaalf uur even met, want dan wil ik wel ies kieken, wel of dat is!!” Om twaalf uur lopen ze met zien beidend naor de oetgang en ja hör, daor steeit de neie vaoder. Het vriendtie zeg : “Is dat hum? Maor die is VET COOL!……..DIE HEBBEN WAI OK AL HAD!!!