Rollegies

Het neie jaor is al weer aordig op streek en de iezers kunt weer opbörgen worden. De bakiezers dan. Wij bakt met zien beidend rollegies. Dat wil zeggen: ik maak het beslag, mien vrouw bakt en ik rol. Over het recept zeg ik aaltied dat het al ieuwenlang in de femelie deurgeven wordt. Niks van waor, ik heb het ooit uut het boekie ‘Proemenkreuze’ haald en een beetie anpast.

We hebt twei elektrische Hörchenautomaten uut Duutslaand. Mooie dingen. In Oost- en Noord- Nederland verkoopt ze die dingen nog aaltied zo tegen december an. En zo produceert wij elk jaor een dikke viefhonderd rollegies. Der is een liesie met ofnemers, veural femilieleden. De verste zit op plekken als Helmond en de Wieringermeer. In die polder woont mien oldste zus. De eerste zundag van het neie jaor gaot we naar Slootdorp, as het even kan. As wij daor arriveert verschient binnen de körste keren ok de nichten, want de mare dat de rollegies weer ankommen bent verspreidt zich elektronisch slim rap.

Vrogger gungen we op Neijaorsdag de hiele buurt an het kanaal op Erica langes. As we binnenkwamen zeden we:

Gelukkig Neijaor,

hej de rollegies klaor?

Een borrel der bij,

da’s goed veur mij.

En as dank kregen we dan een paor rollegies en een glassie kinderlikeur, mierzuut spul. En as we dan thuuskwamen zeden we stoer: We hebt wel vieftien borrels had!

Dat gebruuk is verdwenen, maor de rollegies niet. We hebt de radio der bij an -Top 2000- en het huus vult zich met de geur van de rollegies. Ik rol dus, want mien vrouw wil heur daor de vingers niet an braanden. Onder ’t wachten zit ik op de muziek met het stokkie wat te trommeln op het aanrecht. Ritmegevuul heb ik niet, dus zeg mien vrouw dat het niet om an te heuren is. In antwoord daorop zeg ik dat ik ies nadacht heb en dat we met drei iezers nog rapper bakken kunt. Het is even stille en dan zeg ze: ‘Weej wat? Dan huur ie toch gewoon een Pool in?’

Het is dudelk, we holdt het op twei iezers.

Anne Doornbos