Een “Villa Romantica “ in het dörp, deur Lammert Douwes

Gradus Tissing, veurzitter van Dörpsbelangen Bovenesch is een tevreden man. Een paor daogen leden is hij opnei keuzen tot veurzitter van Dörpsbelangen. Van verdeildheid in het dörp is gien spraoke meer. De femilie El Saawadi is verhoesd. Pa is in de VUT gaon en hef veur een prikkie een hoesie kocht in Loppersum. Ja, hij wus wel, dat ’t middenin het eerdbevingsgebied laag, maor toen ze nog in Marokko woonden, hadden ze wel vaoker een eerdbeving metmaokt en hij zul zien hoesie wel zo op orde brengen, dat der gien gevaor bestun. Dochter Fatima woonde al niet meer in Bovenesch. Zij was oethuwelijkt an een aoldere kerel oet de buurt van Fez.

Maor er dreigde een aander probleem. De villa van de rieke femilie van Boetzelaar stun leeg en is verkocht an Sjaak van der Geest, een bordeelholder oet Amsterdam.

Hij wil er een luxe bordeel met escortservice van maoken. Het pand leint zich der oetstekend veur, beweert Sjaak. Wat aan de raand van het dörp, een mooie oprielaon. Hij wil er wel wat moois van maoken. Volgens het bestemmingsplan kun het ok wel. Het perceel hef de bestemming : “Wonen en maotschappelijke doel -

einden”. Zo neudig wil Sjaak zien plannen wel oeteinzetten in een vergaodering van

Dörpsbelangen. Dat liekt Gradus een goud veurstel.

In de vergaodering an Dörpsbelangen komp Sjaak tekst en oetleg geven.Een aordige kerel, maor wel een gladde praoter. Hij wil er een chique bedouning van maoken veur mensken met een dikke portemonnee.De plaotselijke middenstand zal er ok van profiteren, beleufd Sjaak. Knelis de Vries, die naomens de Christen Unie in de gemeinteraod zit, is er faliekant en principieel op tegen. Ok de naoste buren willen wel wat meer weiten. Kriegen ze niet te maoken met overlast? Gien spraoke van, belooft Sjaak. Het wordt een exclusieve tent, waor het dörp ok zien veurdeil van zal kriegen. Zo mus hij een portier hebben, een wicht veur de tillefoon, wichter die de zaok schoonmaoken, hij zul het taxibedrief van Van der Riet inschaokeln veur het vervoer van de escortdaomes, bij de slieterij zul hij de draankies kopen en bij de dreugisterij de beneudigdheden veur de daomes. Ja, wat mussen de bewoners van Bovenesch der verder van zeggen. Aofwachten maor.

Toen de zaok opend wör, har Sjaak de bewoners ok oetneudigd om een kiekie te nemen. Eein van de jonges van Willems har al een baontie kregen as portier en stun al in zien sjieke pakkie bij de deur. Ze keken zich de ogen oet, wat een chique bedouning. En inderdaod, “Villa Romantica “ gaf gien enkele overlast in het dörp.

De middenstanders hadden gien klaogen en “Villa Romantica “ braocht Bovenesch

zölfs in het neis. Er was naomelijk al enkele maolen een kerel op een scooter signaleerd. Helm op en een brillegie. De roddelpers en kwaoie tongen beweerden, dat het wel ein van de regering wezen kun. Het duurde niet laang, of de camera’s van RTL 4 en Boulevard stunnen bij de oprielaon en paparazzifotograofen lagen in de stroeken. Wat bleek laoter, ein van de jonges van Gradus Tissing zölf har elkeneein een poets bakken en was as een look -a - like van Francois Hollande een paor maol op een scooter naor Villa Romatica reden. In elk geval, Bovenesch stun op de kaort.