De nieuwe column van Martje Grondsma: verkiezingen
Volgen jem alle debatten op de televizie? Dan vroag ik mij of, wat veur zin het dat? Met annere woorden stemmen winnen veur welke partij? Hemmen ze niks beters te doen, vroag ik mij dan of. En hoalt het wat uut? Allèn mor argernis. Woar ze vast meer waardering veur kriegen kennen? Loat ze zuch es een moand verdiepen ien n assielzoekers centrum. Goa es noar Ter Apel hoe het doar toegijt. En niet zoas Rutte, even een flitsbezoekje ofleggen, noar ze luusteren en dan zeggen: het heeft onze aandacht. En de helft is er aal weer vergeten. Kiek es een moand bij de voedselbank. Dan zie je es wat aans.
Kommen er asielzoekers ien Bloemendaal, of al die annere rieke dörpen? Welnee. Dat ken niet. Doar kriegen ze last van. Denk ik ok. Want stelen en roven dat kennen ze. Geef ze wark is veule beter dan dat niks doen. Is wark zat. Dan hemmen ze messchien het idee dat ze waardeerd worden. Mor nou. Wees es eerlijk niks doen? Dan bedenk je allerhande gekke dingen en van t één komt t anner.
O ja dat heurde ik ok nog. Alle landen die bij de EU aansloten bennen, kriegen uut de grode pot onnersteuning om de armoede te bestrieden. Mor Nederland? Welnee, die as enigste niet, want volgens Rutte bennen wij n riek land. Nou kiek es om je hèn. Rutte moet es veur de spiegel stoan goan en tegen zukzelf goan proaten. En vroagen wat heb ik ien al die joaren bereikt? Ik heb duzenden, dan zeg ik het nog veurzichtig, met mien regering, minsen tot de bedelstaf verheven. Is dat niet geweldig. Hoeveul krekt dat wiet ik niet, dat loat ik aan jem over.
En mor debatteren? En dan worden er zomor gemeentes aanwezen: jem moeten asielzoekers opvangen. Stuur eerst degene die uut veilige landen kommen trug. Dan ben je aal van hiel wat overlast verlöst. Mor dat mag zomor niet. O nee.
O ja wat zag ik op de televizie? Goenend die veur de eerste keer hèn mozzen te stemmen wizzen niet hoe dat mos! Hoe stoer is dat dan? Ze bennen zowat allemoal noar school west. En dan moet hen nog verteld worden wat en hoe ze t moeten doen? Is dat dan zo n toer? Nee toch. Ik herinner mij niks meer van de eerste keer. Bovendien wadden er toen vast niet zoveul partijen as nou. Ik hebt aal n keer eerder aankoart, mok er minner partijen van, ien welk land hemmen ze zoveul partijen as bij ons? Nargens toch. Wij bennen uniek. Hol dat goed veur ogen. Er bennen landen die hemmen twee partijen is n stuk makkelijker. Moak er dan eerst tien van. Messchien helpt dat. Want summigen kommen niet eens ien de regering. Wat veur zin het zo n partij dan? En de partij veur de dieren? Zitten de dieren doar op te wachten? Er is vast wel n partij die hun belangen behartigen wil. Denken jem dat ok? Dan komt het vast wel goed. Nou strieken ze n hieleboel minsen tegen de hoaren ien. De wolf, twee, messchien vier, bennen hier uutzet en nou? Bennen er n hieleboel. Hoe ist mooglijk? De schoapen worden niet beschermd tegen de wolven, dat moeten de boeren doen. Hoe bedenken ze t.!
En dan is er nog wat woar ik mij aan arger. Al die onnerzoeksburos. Ist niet veur dit dan wel veur dat. Wieten ze op t gemeentehuus beveurbeeld, wat niet, dan wordt er n onnerzoeksburo ienschoakelt. Nou die verdienen er goed geld aan. Loat dat n fijt weden. As er één op t gemeentehuus warkt veur t één of t anner en hij/zij snapt het niet. Gauw n onnerzoeksburo vroagen, dan ben je er zomor uut. Nou die het er wark met dat ken ik jem wel vertellen, ben je zomor een half joar verder. En degene die t aangijt mor wachten. Je kennen t zo gek niet bedenken of er wordt een onnerzoek noar doan. En pas as de ramp geschiet is, wordt er noar keken hoe het beder en anners kent har. Kiek noar de zunnepanelen. Hoe worden die opruumt noa beveurbeeld tien joar? Nou dan zitten we er mooi met. Hoe gijt het as er brand uutbrekt? En al die grode landerijen bedenkt met zunnepanelen? En hoe moet al die stroom verwarkt worden? Ik wiet het niet meer. Jem wel?
Zo nou wieten jem hoe ik erover denk. Hemmen jem wat om over noa te denken. Mor jem hoeven het niet met mij eens weden. Wel hèn goan te stemmen!
MARTJE
