Kiek: hier zit de drie…
Spellegies.
In oons gezin bint wij der gek op.
Een echt ‘Waninge-ding’ is sjoelen. Bij oons trouwen kregen wij een Homas sjoelbak en hij is veulvuldig gebruukt. Toen oonze drie dochters nog thuus woonden was papa altied de winnaar, dit tot grote frustratie van de dames, die hiel lang maor ien gezaomenlijk streven hadden: papa mag niet winnen. In de loop van de jaoren kwam daor netuurlijk veraandering in.
Oefening baart kunst, is ’t niet zo?
As wij met oons gezin bij mekaor bint komp de sjoelbak vaak op taofel en het is altied serieuze competitie.
Van de ‘heren’ die de dochters de ofgelopen jaren met naor huus namen weur verwacht dat ze ok metsjoelden. Met wisselend succes. Maor de Nederlandse heren wussen in elk geval al wat sjoelen is, de Engelsman die sinds 2017 bij oonze oldste heurt haar gien idee.
De eerste keer dat hij in Nederland logeerde en wij een aovend weg waren bedachten ze dat het goed zul wezen as zij alvast met hum gung oefenen.
Toen wij thuuskwamen stun hij in opperste concentratie te sjoelen en zij stun der schreeuwend bij: dat het “impossible” was en dat hij van heur wun!
Um een beeld te kriegen van hoe dat sjoelen bij oons in zien wark giet een impressie van een taofelgesprek noa een paor potties sjoelen.
Wij hebt met mekaor even hartelijk lacht um een Instagram-post van oonze jongste die ze ’the faces of sjoelen’ hef nuumt, waorop de ofzonderlijke gezinsleden verbeten, verbaosd, geconcentreerd, gefocust en fanatiek aan het sjoelen bint.
Jongste: “Ik sjoelde ooit ies met een cluppie vriendinnen, die wollen allemaol zitten bij ‘t sjoelen!”
Collectieve verbaozing an taofel. ZITTEN!?!
“Ja. En ik gooide constant 120 of meer, want ze haaren niet iens een wedstriedbak.”
Belachelijk ja; wie hef der nou gien wedstriedbak?
Ook deur de aanderen wordt der duuten in het zakkie daon.
“Die puntentelling! Dat a’j vier in de vier hebt zestien punten kriegt en da’j zo alles bij mekaor optelt.”
Oons gezin komp woorden tekört um an te geven hoe stom dat is.
En a’j alle brikken gooid hebt dat dan iene met de vinger veur het balkie langes giet en wat der dan in schöf wordt ‘binnen’ rekend.”
De gezamenlijk verontwaardiging bereikt heur hoogtepunt
De brik zit der pas in as e der hielemaol in zit; dus gien millimeter buuten de opening.
In oonze toch ruum bemeten woonkeuken is der bij sjoelen altied net wat te weinig ruumte. Iederiene bemuit zöch der met en wes het sjoelende familielid in welk vakkie der nog brikken moet.
Volkomen zinloos, want de sjoeler wet dat zölf maor al te goed, maor het hef alles te maken met de psychologische oorlogsvoering die bij dit spellegie heurt.
“Ie hebt der nog maar iene in de drie.
Dan begunt wij te tellen bij 20 hè?
Dat wee j’ toch hè?
As het nou maor lukt om nog iene in de drie te kriegen… kiek: hier zit de drie…”
De leste keer wun oonze Engelse schoonzeun. Ie bint echt wel inburgerd in Nederland a’j de femilie Waninge verslaot in heur eigen spel.
Ada Waninge
